Mrembo wa Sinza kupatikana leo (Ijumaa) ukumbi wa Mawela

Mwandishi Wetu

MASHINDANO ya kumsaka mrembo wa Sinza, Redds Miss Sinza 2012 yatafanyika leo (Ijumaa) kwenye ukumbi wa Mawela Social Hall (Ten Star Lounge) uliopo karibu na hotel ya Vatican City.

Mashindano hayo yatashirikisha jumla ya warembo 14 wanaowania taji la kituo hicho pamoja na kuiwakilisha Sinza kwenye mashindano ya Kanda ya Kinondoni na baadaye Miss Tanzania.

Mbali ya taji (crown) na nafasi ya kuiwakilisha Sinza katika Mashindano ya Kanda ya Kinondoni, pia warembo hao wanawania kitita cha shs. 500,000 cha mshindi wa kwanza katika mashindano hayo yatakayopambwa na bendi ya African Stars “Twanga Pepeta International’.

Mratibu wa mashindano hayo kutoka kampuni ya Calapy Entertainment, Majuto Omary alizitaja zawadi nyingine kuwa ni shs 400,000 kwa mshindi wa pili, shs 300,000 kwa mshindi wa tatu . Mshindi wa nne na wa tano watapata shs 150,000 kila mmoja na waliobaki watapata shs 100,000 kila mmoja kama kifuta jasho.

Majuto alisema kuwa mbali ya kutembea jukwaani kwa ‘catwalk’ kwa warembo hao, pia kutakuwa na shindano la kusaka vipaji ambapo warembo watachuana  ili kumpata mshindi atakayepata shs 50,000 kutoka kwa sufianimafoto.blogspot.com.

“Maandalizi yamekamilika na kiingilio kitakuwa shs 10,000 kwa viti vya kawaida na shs 25,000 kwa vitu Maalum (VIP), tumeandaa shoo fupi na ya aina yake ili baadaye mashabiki wa urembo wa Sinza wasugue kisigino na bendi ya Twanga Pepeta,” alisema Majuto.

Warembo wanaowania taji hilo ni Warembo wanaowania  taji hilo ni Mariam Miraji, Naima Mohamed, Lulu Ambonela, Maria John,  Judith Sangu, Eva Mushi, Vailet John na  Esther Mussa.

Warembo wengine ni Christina Samwel, Nahma Said, Aisha Ramadhan, Nancy Musharuzi, Brigitter Alfred na Merina Mushi.

Shindano hilo lililodhaminiwa na Redds Premium Cold, Dodoma Wine, Gland Villa Hotel, Clouds FM, sufianimafoto.blogspot.com, Brake Point, Fredito Entertainment, Screen Masters,  Lady Pepeta na flexi.